ҚТЖ теміржол инфрақұрылымына үздіксіз инвестиция салып келеді. Әсіресе Қытаймен шекарада және Каспий теңізі аймағында. Бұл жүк тасымалдарының, оның ішінде транзиттің жыл сайынғы өсуін қамтамасыз ете отырып, қолайлы логистикалық ахуал қалыптастырып отыр. Маңғыстау облысындағы порттар Транскаспий халықаралық көлік бағдарының (ТХКБ) негізгі нысандары болып табылады.
Бүгін «ҚТЖ» ҰК» АҚ инфрақұрылымдық нысандарына: Ақтау теңіз сауда портына, «Құрық» портына және Ақтау солтүстік теңіз терминалына арнайы баспасөз турын ұйымдастырды. Журналистерге ТХКБ бойынша порттар арқылы жүк ағындарын арттыру бағытында жүргізіліп жатқан жұмыстар туралы айтылды.
Ақтау теңіз сауда порты
Ақтау порты барлық кеме түрлерінің кіруі үшін жыл бойы ашық. Соңғы 3 жылда (2019 жылдан бастап 2021 жылға дейін) порт екі мыңға жуық кеме қабылдаса, ауыстырып тиелген әр түрлі жүктер (мұнай және мұнай өнімдері, металл, астық және өзге де жүктер) көлемі 10 млн.тоннадан асты. 2022 жылдың 4 айында 1,2 млн.тоннадан астам жүк ауыстырып тиелсе, оның ішінде импортқа — 110 мың тонна, экспортқа 1 млн. 96 мың тонна жөнелтілді.
«Ақтау теңіз сауда порты» ҰК» АҚ басшысы Абай Түрікпенбаев контейнерлік жүктерді ауыстырып тиеу көлемінің айтарлықтай өскенін атады.
- Осы жылдың ақпан айында Ақтау порты арқылы 1 657 ЖФЭ контейнер ауыстырып тиелді, ал сәуір айында бұл көрсеткіш 2 есе өсіп, 3 099 ЖФЭ-ні құрады. Биыл контейнерлік тасымалдар өткен жылғы деңгейге қарағанда екі есеге – 50 мың ЖФЭ дейін, ал ТХКБ маршруты бойынша тасымалдар көлемі алты есеге - 3,2 млн.тоннаға дейін өседі деп күтілуде, - деп атап өтті Абай Түрікпенбаев.
Ақтау порты көпмақсатты заманауи терминал ретінде танылады. Қойма алаңдарында жүктерді сапалы және сенімді сақтау үшін барлық жағдайлар жасалған. Ауданы 80 мың м2 асатын ашық қойма алаңдарында бір мезгілде 2 500 контейнерді сақтауға болады. Жабық транзиттік қойма ауданы 2 мың м2 құрайды. Портта басты, өлшемелі-бірлікті және габаритті емес жүктерді өңдеуге арналған үш әмбебап құрғақ жүк айлағы бар. Астықты қайта тиеу және жүкті көлденінең өңдеу әдісімен кемелерді өңдеуге арналған тағы бір айлақ жұмыс істеуде.
Журналистер нақты өткізу қабілеті 2 млн.тонна тікелей аралас темір жол-су қатынасымен келе жатқан вагондарды кіргізіп-шығаруға мүмкіндік беретін паром кешенінде болды.
Ақтау астық терминалының қуаты жылына 700 мың тоннаны өндеуге мүмкіндік береді. Бір мезгілде бұнда 22,5 мың тоннаға дейін астық сақтауға болады. Алты мұнай құю айлағы бір уақытта 5 танкерді (12 мың тоннаға дейін) өңдейді. Порттың кез келген жүктерді өндеуге мүмкіндік беретін техникалық паркі де бар.
«Құрық» порты
«Құрық порты» ЖШС Бас директоры Серік Ахметов бір мезгілде 4 паромға қызмет көрсете отырып, теміржол және автомобиль айлақтарымен бөлінген порттың инфрақұрылымы туралы айтып берді. Баспасөз турына қатысушылар диспетчерлік қызмет ғимараттарына, теңіз вокзалына, кедендік ресімдеу пунктіне барды. Оларға сондай-ақ «бір терезе» қағидаты бойынша қолайлы жүк ағынын өңдеу технологиясын көрсетті.
- Теміржол айлағының өткізу қабілеті жылына 4,1 млн. тоннаны құрайды. Паромды өңдеудің толық циклінің орташа уақыты – бір деңгейлі – 6-8 сағат, ал екі деңгейлі – 10-12 сағат, бұл күніне 5-8 паромды өңдеуге мүмкіндік береді. Паромдарға 54 теміржол вагоны сияды, - деп түсіндірді Серік Ахметов. - Құрық порты арқылы мұнай өнімдері, химиялық өнімдер, металл, халық тұтынатын тауарлар және басқалары ауыстырып тиеледі. Импортты азық-түлік өнімдері, өнеркәсіптік жабдықтары, құрылыс материалдары және басқа да жүктер құрайды. Порт арқылы транзитпен әр түрлі жабдықтар, электроника, тоқыма, химия өнімдері, металл бұйымдары өтеді.
Ақтау Теңіз Солтүстік Терминалы
АТСТ Каспий теңізінің шығыс жағалауында орналасқан және ТХКБ, ТРАСЕКА және Солтүстік-Оңтүстік халықаралық көлік дәліздерінің құрамдас бөлігі болып табылады, солтүстік терминалдан жүктер көбінесе негізінен Иран, РФ, Әзірбайжан порттары бағытында тасымалданады. «Ақтау портын солтүстік бағытта кеңейту» жобасы елдің көлік-логистикалық инфрақұрылымын одан әрі дамыту шеңберінде іске асырылды.
- Терминал жыл бойы жұмыс істейді. Бұл жылына 3 млн.тоннаға дейін жүкті ауыстырып тиеуге мүмкіндігі бар, оның ішінде дәнді дақылдар – 1 млн. тонна, бас жүктер – 2 млн. тонна, ауданы 39,4 га құрайтын көпмақсатты заманауи кешен. Контейнерлерді ауыстырып тиеу бойынша оның мүмкіндіктері – жылына 70 мыңнан астам ЖФЭ, бір мезгілде біз мұнда 6 мың ЖФЭ-ге дейін сақтай аламыз, - дейді «Ақтау Теңіз Солтүстік Терминалы» ЖШС Бас директоры Дәурен Қалиасқаров, - бұл ретте бір уақытта 60 мың тоннаға дейін сақтау мүмкіндігі бар астық және бір мезгілде 170 мың тоннаға дейін бас жүктерді жеткізуге қабілеті бар жүк терминалдарынан құралған 4 айлақ негізгі нысандарының жалпы ұзындығы 587 метр.
АТСТ басшысының айтуынша, жобаны іске асыру Ақтау портының қуатын бас жүктер бойынша 2 млн.тоннадан 4 млн. тоннаға дейін, астық бойынша 1,5 есеге, яғни 0,6 млн. тоннадан 1,6 млн. тоннаға дейін арттырды. Негізгі және қосалқы техниканың ағымдағы паркі басты және контейнерлік жүктердің барлық түрлерін ауыстырып тиеуге мүмкіндік береді.
Терминалды іске қосқаннан бері 1275 кеме өңделіп, жүктерді ауыстырып тиеу 5,6 млн.тоннадан асты. 2021 жылы 980,6 мың тоннадан астам жүк ауыстырып тиелсе, оның 800,4 мың тоннасы экспорттық бағытта және 178,2 мың тоннасы импорттық бағытта жөнелтілді. 2020 жылы контейнерлерді ауыстырып тиеу көлемі 3 399 бірлікті құрады. 2022 жылдың 4 айында жүктерді ауыстырып тиеу 282,7 мың тоннаны құрады және 85 кеме өңделді.
