Қазақстан Республикасы Индустрия және инфрақұрылымдық даму министрлігі Көлік комитеті төрағасының орынбасары Нұркенов Қайриденнің жетекшілігімен «Каспий порттары мен кеме қатынасы - 2021» 2 -ші халықаралық көрмесі мен конференциясы аясында кездесу өтті. Кездесуге «Құрық порты» ЖШС бас директоры Серік Ахметов те қатысты.
Жиынның мақсаты - Каспий теңізінде кеме қатынасын дамытуға және теңіз көлігіндегі қауіпсіздікті қамтамасыз етуге бағытталған шешімдерді талқылау және іздеу болып табылады.
Отырыс барысында Каспий өңіріндегі сауда сұранысы, көлік саласына инвестиция салу перспективалары, жүк ағындарын контейнерлеу, инфрақұрылымды цифрландыру, "жасыл экономиканы" дамыту мәселелері талқыланды.
Конференцияға әлемдік деңгейдегі көлік және логистика саласындағы 80-нен астам түрлі ұйым өкілдері, Еуропалық Одақтың 11 елшісі, оның ішінде Бельгия, Болгария, Хорватия, Финляндия, Германия, Латвия, Румыния, Испания, Эстония, Нидерланды елшілері, Каспий маңы елдері мен Түркияның консулдары, сондай-ақ Транскаспий халықаралық көлік бағдарының мүшелері қатысты.
Жалпы Каспий форумы мемлекет пен бизнестің көпжоспарлы қарым-қатынасы мен Азия мен Еуропа арасындағы көлік қатынасын одан әрі дамыту үшін сындарлы ұсыныстар әзірлейтін алаңға айналады.
