«Каспий порттары және кеме қатынасы - 2021» конференциясы аясында халықаралық көрмеге қатысушылар Құрық порты паром кешеніне келді.
Сапардың мақсаты - Құрық портының қызметімен, пайдалану қуаттылығымен, сондай-ақ инфрақұрылымымен танысу.
Делегацияны «Құрық порты» ЖШС бас директоры Серік Ахметов қарсы алды. Ол өз кезегінде қонақтарға компанияның жұмыс барысын көрсетіп, Құрық порты арқылы пайдалануға берілген сәттен бастап жүктерді ауыстырып тиеу динамикасына шолу жасап өтті.
- Қазіргі уақытта Қазақстаннан Түркияға, Грузияға және Әзірбайжанға кететін жүктердің бағытын Құрық порты арқылы өзгерту бойынша жұмыстар жүргізілуде. Бұл бізге жаңадан салатын паромдарымыз үшін жеке жүк базасын жасауға мүмкіндік береді, - деді Серік Жетпісбайұлы.
Сонымен қатар, порттың бас директоры ЕЭА-ға кіру жоспарлары, «Жасыл порт» халықаралық экологиялық жобасын іске асыру шеңберінде атқарылып жатқан жұмыстар және портты дамыту бойынша басқа да стратегиялық жоспарлар туралы айтты.
Кездесу барысында делегаттар порт аумағындағы бірқатар нысандарды аралады. Теміржол мен автокөлік айлақтарын және жаңа астық терминалының құрылысын ,сонымен қатар компанияның толық инфрақұрылымымен танысты.
Кездесу соңында компаниялар өкілдері паромдық кешеннің әлеуетін жоғары бағалап, жұмысына одан сәттілік тіледі.
Естеріңізге сала кетейік, делегацияның сапары «Каспий порттары мен кеме қатынасы-2021» конференциялық бағдарламасы аясында жүзеге асырылуда, оған кемінде 30 әлемдік деңгейдегі көлік-логистикалық ұйымдар мен бірқатар жоғары дәрежелі ұйымдар қатысады. Қатысушылар тізімінде дүниежүзілік банктің шенеуніктері, Қазақстандағы Еуропалық Одақтың Елшісі, Еуропалық Одақ елдерінің елшілері, мемлекеттік органдар, порттар мен кеме қатынасы компаниялары, сондай-ақ көлік саласындағы компаниялар бар.
