Қазақстан Республикасы Парламентінің сенаторлары Маңғыстау облысына жасаған жұмыс сапары аясында Құрық портына келді. Паромды кешеннің бас директоры Серік Ахметов делегацияны Құрық портының қызметімен таныстырды. Сондай-ақ, порттың алдағы даму жоспары туралы да айтты.
Депутаттар порт аумағындағы бірқатар нысандармен өндірістік қуаттылығымен де таныс болды.
Өз кезегінде делегация өкілдері портқа дейін төселіп жатқан жол бойына туристік кешендепді көп салу керек екендігіне назар аударды. Бұл ретте мемлекеттен қолдау үнемі бақылауда болатынын да жеткізді.
-Қазір жол салынып жатыр. І категориялы. Егер салынып болғаннан кейін бұл жерден тек жүк қана емес, жолаушылар да Ақтау қаласына 30-40 минутта жетіп барады. Жолдың бойына қонақүйлер, суға түсетін арнайы орындар, демалатын орындар салынатын болса толыққанды туристік аймаққа айналдыруға болады. Бұл, қаншама азаматтарға жұмыс береді. Екіншіден, жергілікті жерлерге қаржы түсіреді. Салық түсіреді. – деп атап өтті ҚР парламенті сенатының депутаты Мұрат Бақтиярұлы.
Кездесу соңында депутаттар Құрық портының жұмысына жоғары баға беріп, алдағы уақыттарға сәттілік тіледі.
2016 жылы Елбасының бастамасымен іске қосылған кешен бүгінге дейін 6 млн. тоннадан астам түрлі жүктерді ауыстырып тиеді.
